| amr's profileGXPhotosBlogLists |  Tools  Help |
|
March 21 قصة وداعكانت من أكتر الناس اللى بحبها فى حياتى
كنت لما اكون زعلان أروحلها
و لما حد يدايقنى أروح أقعد معاها
و تفضل تكلمنى و تدلعنى كدة و تقولى متزعلش
لما كان حد يزعلنى تقولو ملكش دعوة بية وتاخدنى معها
عمرى ما فى مرة حسيت انها ممكن تبعد عنى
او فى يوم أصحى مش ألقيها موجودة
عمرى ما فكرت فى الموضوع دة
كنت فاكر انها هتفضل معيا علطول
وقت ما أكون عايزها أكلمها
و وقت م أكون عايز أشوفها أروحلها
كانت طيبة أوى
كان نفسى تفضل معايا علطول
بس طبعاً دة قدر ربنا
المهم كنت ف يوم المفروض رايحلها و اتأخرت شوية و أنا قاعد سمعت التليفون بيرن روحت عشان أرفع السماعة وبصيت على الرقم شوفت رقمها حسيت احساس غريب أوى
حسيت ان فى حاجة كدة اتخطفت منى من غير ما تحصل حاجة
المهم رفعت السماعة محدش رد عليا أتخضيت أوى
فأتصلت انا كان مشغول و حطيت السماعة وأول ما حطيتها رن تانى التليفون
فرد عليا حد وبيقولى نادى ماما يا عمرو
طبعا حسيت أن احساس فظيع خطفنى
المهم روحت ناديتها و فضولى كان مخالينى مش قادر ماسمعش المكالمة و يمكن مش فضول أكتر منة اهتمام
فرد عليها بيقولها ماما تعبانة أوى تعالى بسرعة
روحت نازل مع ماما بسرعة و روحنا
أول ما دخلت شوفتها نايمة و مش بتتكلم
قولتلهم حد جاب دكتور قالو اة فى حد نزل يجيب دكتور
نزلت جرى بسرعة أدور على دكتور و طبعا كانت الساعة وقتها 2 باليل ومش لاقى أى دكتور و فضلت أجرى فى الشارع أدور على دكتور و مش لاقى
لحد ما صلت فى مكان بعد شوية عن بيتنا لاقيت مستشفى كدة و دخلت قولتلهم عايز دكتور بسرعة قالى طيب عايزين فلوس تحت الحساب قولتلو انا نزلت بسرعة مش معايا دلوقتى لما يجى هاديلو اللى هو عايزو
قالى لا مش هاينفع يتحرك من هنا قبل ما ياخد فلوس
قولتلو واللهى هاديلو اللى عايزو بس يجى عشان يلحق تعبانة قوى
قالى لا مش هاينفع
حسيت و أنا خارج من عندو أن خلاص كدة هو قدر ربنا كدة
المهم روحت تانى على البيت عشان أشوف اية الاخبار
و أول ما وصلت سمعت صوت ناس بتعيط فوق عرفت أن كدة خلاص مش هاشوفها تانى
روحت مشيت علطول من غير ما أعرف انا مكانى فين ولا رايح فين و أنا ماشى و حتى مش معايا فلوس ولا اى حاجة
ومش عارف اعمل اية
حاسس أن مفيش حاجة عادى هى ماسبتنيش و ماينفعش أصلا تسبنى عشان عمرى ما فكرت ان هى تسبنى فى اى يوم من الايام
روحت جرى عديت على واحدصاحبى و أنا بجرى فى الشارع و ناديت علية محدش رد عليا فا مشيت
و فضلت ماشى كتير مش عارف أعمل اية ولا فى اية لحد ما قابلت واحد أعرفو قاى البقاء للة و قولتلو انا عايز أكلم واحد صاحبى قالى طيب كلمو هو و قالو عمرو عايزك ضرورى
و هو فضل معاييا لحد ما قابلت صاحبى
و أول ما شوفت صاحبى لقيت نفسى دموعى بتنزل منى غصب عنى و مش قادر أمسكها
و فضلنا كدة لحد الفجر ما أدن ماشى فى الشارع و هما معايا
و روحنا عشان نصلى الفجر فقابلت بابا وخالو و قالولى على العزى و الدفن و كدة
و طبعاً دة كان أول مرة فى حياتى أكون فى موقف زى دة
فضلت قاعد لحد الساعة8 الصبح فا صاحبى قالى روح نام شوية عشان تقدر تكمل عشان لسة اليوم طويل أوى و فى دفن بعد الظهر
و روحت عشان أنام و حطيت راسى على المخدة مقدرتش فضلت أعيط جامد أوى بس بردة مش متخيل انى مش هشوفها تانى خالص
و مقدرتش أنام و روحت تانى لصاحبى
و بعد كدة صلينا صلاة الجنازة و روحنا على مكان الدفن
ووقفنا على القبر و هما بينزلوها و أنا واقف بشوفها لاخر مرة فى حياتى
و كأنى مش شايف اى حد خالص من الناس
وناس كتير بتسلم عليا ومش شايف ولا سامع حد
وعمرى ما حسيت ان هيا سابتنى أبدا و حاسس انها فى بالى علطول
لدرجة ان بعد 3 سنين و عمرى ما حاسيت انها مش موجودة
ساعات بحس انها موجودة و هاروحلها او هكلمها
و أن هيا لسة بتقعد فى نفس مكانها و فى نفس حركتها
بس بجد كانت أول مرة أحس فيها بالوداع و الفراق
وداعاً يا اطيب و أجمل أنسانة عرفتها
ربنا يرحمك و يغفر ليكى و يدخليك الجنة
اللهم أغفر لها و أرحمها
اللهم نقها من الذنوب و الخطايا كما ينقى الثوب الابيض من الدنس
وأغسلها بالثلج و الماء و المطر
اللهم اجعل قبرها روضة من رياض الجنة
اللهم تجاوز عن سيئاتها
وأدخلها الجنة مع الصديقين و النبيين و الشهداء
امين TrackbacksThe trackback URL for this entry is: http://gx9oo.spaces.live.com/blog/cns!360811458524A07B!394.trak Weblogs that reference this entry
|
|
|
